İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin (AİBNDX) nümayəndələri Azərbaycan-Türkiyə İş Adamları Birliyinin (ATİB) təşkil etdiyi tədbirdə iştirak ediblər.

İşgüzar nahar formatında təşkil edilən tədbirdə Dövlət Xidmətinin rəisi Məmməd Abbasbəyli iş adamlarına Dövlət Xidməti və onun tabeliyində olan qurumların fəaliyyət istiqamətləri, əldə olunan nəticələr, rəqabət siyasəti, dövlət satınalmaları, keyfiyyət təminatı və istehlakçı məmnuniyyəti sahələrində yeniliklər barədə məlumat verib.

Türkiyənin Azərbaycandakı səfiri Cahit Bağcı digər sferalarda olduğu kimi, biznes sahəsində də qardaş ölkələrin sıx əməkdaşlığını yüksək qiymətləndirib.

Azərbaycan-Türkiyə İş Adamları Birliyinin İdarə Heyətinin sədri Cemal Yangın dövlət-özəl tərəfdaşlığının önəmindən danışıb, dayanıqlı iqtisadi inkişafın təmin edilməsində biznes subyektlərinin rolunu vurğulayıb.

Tədbirdə Türkiyə və Azərbaycanın 100-dən artıq biznes təmsilçisi iştirak edib.