Azərbaycanın işğaldan azad edilmiş ərazilərində məskunlaşmanın təmin olunması və mövcud resursların kənd təsərrüfatı məhsullarının istehsalına tam cəlb edilməsi ölkədə aqrar istehsalın 8 faizdən çox artmasına imkan yarada bilər.

Bu barədə "vergiler.az"a Kənd Təsərrüfatı Nazirliyinin Aqrar Tədqiqatlar Mərkəzinin direktoru Firdovsi Fikrətzadə deyib.

Onun sözlərinə görə, aparılan hesablamalara əsasən, bu ərazilərin resursları hesabına ölkədə taxıl istehsalı ildə 400 min ton, ət istehsalı 45 min ton, süd istehsalı isə 240 min ton artırıla bilər.

“Ərazilərin iqlim və relyef xüsusiyyətləri heyvandarlıq və taxılçılıq kimi ənənəvi sahələrlə yanaşı, meyvə-tərəvəz istehsalının inkişafı baxımından da böyük imkanlar yaradır”, - deyə F.Fikrətzadə qeyd edib.
O, əlavə edib ki, regionda intensiv meyvə bağlarının salınması geniş hal ala bilər, çünki aparılan təhlillər göstərir ki, regionun təbii-iqlim xüsusiyyətləri gilas, ərik, şaftalı kimi ixrac əhəmiyyətli çəyirdəkli meyvələrin, xüsusilə də nar, fındıq və xurma kimi ölkənin dünya bazarında mühüm paya malik olduğu meyvələrin yetişdirilməsi üçün çox uyğundur.