“Sadələşdirilmiş vergi sisteminin əhatəsinin genişliyi uçot tələblərini sadələşdirmiş və sahibkarlarda uçot “səhlənkarlığı” yaranmışdı”.

Bakı Hesabat Mərkəzinin direktoru Mehdi Babayev “İnklüziv və davamlı inkişaf üçün vergi islahatları: rəqəmsal transformasiya ilə könüllü əməletməyə doğru” mövzusunda keçirilmiş forumda çıxışında diqqəti bu problemə yönəldib: “Mənfəət vergisi və ƏDV-nin tətbiqindəki yeniliklər, o cümlədən müxtəlif uçot məlumatlarının elektron sənəd formasında göndərilməsi tələbləri bütün təsərrüfat əməliyyatlarını uçota almaq məcburiyyəti yaradıb. Sənədləşmənin elektronlaşdırılması, yeni elektron münasibətlər uçota qarşı səhlənkarlığı da aradan qaldırıb”.

M.Babayev səsləndirdiyi fikirlərə misal olaraq qeyd edib ki, ƏDV ödəyiciləri tərəfindən ilin əvvəlinə debitor və kreditor borclar barədə məlumatların verilməsi tələbi qoyulub. “Bu tələb nəticəsində uçota ciddi yanaşmayan bəzi sahibkarlar, yəni kontragentlər arasında qarşılıqlı üzləşmələrin intensivliyini artırmağa başladı ki, bu da töhfəsini verdi: belə sahibkarlar arasında yarana biləcək mülki mübahisələrin əvvəlcədən aradan qaldırılmasına zəmin yaratdı”.