Koronavirus pandemiyası ilə əlaqədar 2020-ci ildə dünya üzrə neft və digər enerji daşıyıcılarına tələbat azalsa da, hazırda enerjiyə tələbat artmaqdadır, orta və uzaq perspektivdə bu tələbatın ciddi şəkildə artacağı gözlənilir.

Bu proqnoz OPEC-in 2021-ci il üzrə “World Oil Outlook” hesabatında yer alıb. OPEC mütəxəssislərinin rəyinə görə, 2045-ci ilədək ilkin enerji daşıyıcılarına olan tələbat dünya üzrə 28 faiz artacaq və dünyada neft və qazın istehlakı da çoxalacaq. İqtisadçılara görə, 2045-ci ilədək dünyada qlobal iqtisadi inkişaf iki dəfə arta və dünya əhalisinin sayı 9,5 milyard nəfərə çata bilər. Bu isə dünyada əmək qabiliyyətli (15-64 yaş arası) əhalinin 900 milyon nəfər çoxalması deməkdir.

İnkişaf etmiş sənaye ölkələri havaya buraxılan zərərli qazların həcminin azaldılmasına dair vədlər vermələrinə və avtomobil istehsalçılarının elektrik mühərriki ilə çalışan avtomobillərin istehsalına böyük vəsaitlər sərf etməsinə baxmayaraq, neftin uzun illər boyu mühüm yanacaq mənbəyi olaraq qalacaq və 2045-ci ildə qlobal enerji istehlakında onun payı 28 faiz təşkil edəcək.