Avqustun 7-də Bakı Dövlət Universitetinin (BDU) rəhbərliyi ilə Vergilər Nazirliyinin Tədris Mərkəzinin nümayəndələri arasında görüş keçirilib.

BDU-nun rektoru Elçin Babayevin, Tədris Mərkəzinin rəisi Fərhad Əmirbəyovun, mərkəzin elmi-tədqiqat işləri üzrə rəis müavini Mirəli Kazımovun və Vergilər Nazirliyinin İnsan resursları Baş İdarəsi rəisinin müavini Nərgiz Muradovanın iştirak etdikləri görüşdə universitet ilə Vergilər Nazirliyinin Tədris Mərkəzi arasında imzalanacaq əməkdaşlıq müqaviləsinə dair fikir mübadiləsi aparılıb.

Görüş zamanı kadr və tədris hazırlığı işlərinin Vergilər Nazirliyinin prioritetlərindən olduğu qeyd edilib, BDU tələbələrinin vergi orqanlarında karyera imkanları və iş prinsipləri barədə məlumatlandırılmasının, eləcə də əməkdaşlıq çərçivəsində BDU tələbələri ilə mütəmadi görüşlərin əhəmiyyəti vurğulanıb. "Vergi hüququ" və "Vergi psixologiyası" fənlərinin tədrisinin vacibliyi qeyd edilib, BDU-da bu fənlərin tədris olunması üçün kadr potensialının olduğu və növbəti mərhələdə "Vergi hüququ" kafedrasının yaradılmasının mümkünlüyü bildirilib.

Görüşdə Vergilər Nazirliyinin Tədris Mərkəzi ilə BDU arasında qarşılıqlı maraq doğuran digər məsələlər də müzakirə olunub.