2019-cu ilin 1-ci rübündə vergi orqanlarına 63.388 müraciət daxil olub ki, onların da 94,3 faizi ərizə, 5,6 faizi şikayət, 0,1 faizi isə təklif xarakterli olub.

Daxil olmuş müraciətlərin 51,9 faizi müxtəlif arayışların alınması, 16,8 faizi kameral vergi yoxlamaları, 11,9 faizi sosial sığorta ödənişləri, 7,8 faizi vergi borcları, qalanları ƏDV, vergi qanunvericiliyinin tətbiqi, vergidən yayınma, qanunsuz sahibkarlıq fəaliyyəti, nağd hesablaşmaların aparılması qaydalarının pozulması, səyyar vergi yoxlamaları, operativ vergi nəzarəti tədbirləri, işə qəbul, işlə təmin edilmə və digər məsələlərlə bağlı olub. Hesabat dövründə vergi orqanlarına daxil olmuş müraciətlərin 79,9 faizi tam, 0,3 faizi qismən müsbət həll olunub, 18,5 faizi barədə müvafiq izahatlar verilib.

Vergilər Nazirliyinin Aparatına daxil olmuş 5.168 müraciətdən 72,8 faizi ərizə, 26,0 faizi şikayət,1,2 faizi təklifdir. Müraciətlər kameral vergi yoxlamaları, sosial sığorta ödənişləri, vergi qanunvericiliyinin tətbiqi, vergidən yayınma, nağd hesablaşmaların aparılması qaydalarının pozulması, qanunsuz sahibkarlıq fəaliyyəti, müxtəlif arayışların alınması və digər məsələlərlə bağlı olub.

2019-cu ilin 1-ci rübü ərzində vergi orqanlarının aidiyyəti struktur bölmələrinin və vahidlərinin rəhbərləri və digər vəzifəli şəxsləri tərəfindən ümumilikdə 1.408 vətəndaş qəbul edilib. Qəbul zamanı hər bir vətəndaşın müraciətinə fərdi qaydada yanaşılıb, onların qanuni tələblərinin müsbət həll olunması üçün lazımi tədbirlər görülüb, həlli imkan xaricində olan məsələlərlə bağlı qanunamüvafiq izahatlar verilib.