27 Sentyabr 2020

VERGİLƏR

SOSİAL-İQTİSADİ ONLAYN QƏZET

TANAP-la indiyədək 2,4 mlrd. kubmetrə yaxın Azərbaycan qazı nəql edilib

Bu ilin yanvar-avqust aylarında Trans-Anadolu qaz kəməri (TANAP) vasitəsilə Türkiyəyə 1.473,2 mln. kubmetr Azərbaycanın "Şahdəniz" qaz-kondensat yatağında hasil edilən qaz nəql edilib. "APA"nın verdiyi məlumata görə, istifadəyə veriləndən bu ilin sentyabr ayının 1-dək TANAP-la 2.389,5 mln. kubmetr qaz nəql edilib. Proqnoza əsasən, cari ilin sonunadək kəmərlə Türkiyəyə (kəmər istifadəyə veriləndən) 3 mlrd. kubmetr qaz nəql etmək planlaşdırılır.

“Şahdəniz-2” layihəsi çərçivəsində hasil olunan Azərbaycan təbii qazı əvvəlcə Türkiyəyə, sonra da Avropaya nəql ediləcək Cənub Qaz Dəhlizinin ən önəmli həlqəsi olan TANAP-ın Türkiyə-Gürcüstan sərhədindən Əskişəhərə qədər olan hissəsi 2018-ci il iyunun 12-də keçirilmiş beynəlxalq açılış mərasimində istifadəyə verilib, iyunun 30-da isə Türkiyəyə kommersiya məqsədli qazın axını başlayıb. Boru xəttinin Əskişəhərdən Türkiyə-Yunanıstan sərhədinə qədər olan ikinci hissəsində isə mexaniki tamamlama işləri 2018-ci ilin sonunda başa çatıb, cari ilin aprelində xəttə sınaq məqsədilə qaz vurulub. Bu il iyulun 1-dən Avropaya qazın nəqli üçün tamamilə hazır vəziyyətə gətirilən TANAP, eyni zamanda, tarixə Türkiyə, Yaxın Şərq və Avropanın ən uzun və ən geniş diametrli təbii qaz xətti kimi düşüb. Türkiyə-Yunanıstan sərhədində TANAP ilə birləşəcək TAP boru kəmərində aparılan işlər tamamlandıqdan sonra (2020-ci ildə) Azərbaycan qazı gələn ildən etibarən Avropa bazarlarına nəql olunacaq.

Xatırladaq ki, 1.850 km uzunluğa malik olacaq TANAP-ın illik gücü 16 mlrd. kubmetr təşkil edəcək. Bunun 6 mlrd. kubmetri Türkiyəyə, 10 mlrd. kubmetri isə Avropaya nəql ediləcək. TANAP boru kəmərinin səhmdarları SOCAR və Azərbaycan İqtisadiyyat Nazirliyinin birgə müəssisəsi olan “Cənub Qaz Dəhlizi” QSC (51 faiz), BOTAŞ (30 faiz), BP (12 faiz) və “SOCAR Türkiye Enerji A.Ş” (7 faiz) şirkətləridir.