Avropa Ədalət Məhkəməsi "Apple" şirkətinin 13 milyard avro cəriməsini ləğv edib
Məhkəmənin açıqlamasında bildirilib ki "Avropa Komissiyası rəqabət üzrə Avropa normalarının "Apple" tərəfindən pozulduğunu hüquqi cəhətdən əsaslandıra bilmədiyi üçün ümumi yurisdiksiyalı Avropa Ədalət Məhkəməsi mübahisəli qərarı ləğv edib". Qeyd edək ki, Avropa Komissiyası 2016-cı ildə "Apple" şirkətindən şirkətin bir sıra bölmələrinin yerləşdiyi İrlandiya hökumətinə 13 milyard avro vəsait qaytarmağı tələb etmişdi. Başqa sözlə desək, Avropa Komissiyası İrlandiya tərəfindən verilən vergi güzəştlərini qeyri-qanuni hesab ediyinə görə ödənilməmiş vergilərin kompensasiya edilməsini tələb etmişdi. Ekspertlər Avropa Ədalət Məhkəməsinin bu qərarının "Google", "Microsoft", "İntel" kimi digər nəhəng internet şirkətlərinə Avropa Komissiyasının tətbiq etdiyi cərimələrin ləğv edilməsi üçün presedent təşkil edə biləcəyini vurğulayırlar.
