Amerika Beynəlxalq Polad Sənayesi İnstitutundan (AIIS) verilən açıqlamada bildirilib ki, ABŞ Ali Məhkəməsi institutun polad idxalına tətbiq olunan gömrük vergisi tarifinin ölkə Konstitusiyasına uyğun olmadığı barədə iddiasını rədd edib.

Polad idxalına gömrük tarifinin tətbiqi ilə bağlı qərar ucbatından AIIS üzvlərinin və polad tədarükü zəncirində çalışanların zərər gördüyü qeyd olunan açıqlamada qərarın yenidən qiymətləndirilməsi barədə müraciətin Ali Məhkəmə tərəfindən qəbul edilməməsinə baxmayaraq institutun irəli sürdüyü dəlillərin düzgün olduğu göstərilib.

Qeyd edək ki, ABŞ Prezidenti Donald Tramp 2018-ci ilin mart ayında milli təhlükəsizliyi qorumaq adı ilə polad və alüminium idxalına müvafiq olaraq 25 və 10 faiz dərəcəsi ilə gömrük tarifinin tətbiqi barədə qərar imzalamışdı. AIIS ilk dəfə 2018-ci ildə "Ticarətin genişləndirilməsi haqqında" Qanunun 232-ci fəslinin Konstitusiyaya zidd olduğu iddiasını irəli sürmüş, lakin Beynəlxalq Ticarət Məhkəməsi bu iddianı rədd etmişdi.