Rusiya Maliyyə Nazirliyinin mövqeyinə görə, "Google" və "Facebook" kimi internet nəhəngləri bu ölkədəki fəaliyyətlərindən əldə etdikləri gəlirlərini bölməlidirlər. Hazırda onlar öz gəlirlərini vergidən yayındırır və bundan büdcə itirir.

Maliyyə Nazirliyinin bu təkilifi irəli sürməsi xəzinəni doldurmaq üçün bütün dünyada rəqəmsal xidmətlər göstərən iri transmilli şirkətlərin vergi yükünün artırılması məqsədilə işlədiyi variantların tərkib hissəsidir. Nazirlik şirkətlərin vergiyə cəlb edilməsinə yanaşmanı elə dəyişdirmək niyyətindədir ki, nəhəng rəqəmsal korporasiyalar yalnız baş ofislərinin qeydiyyatda olduğu ölkələrdə gəlir vergisi ödəməklə kifayətlənməsinlər, həm də həmin gəlirləri əldə etdikləri ölkənin büdcəsinə öz töhfələrini versinlər. Rusiyanın dövlət büdcəsi layihəsi ilə birlikdə Dumaya təqdim olunmuş "2020-ci il, eləcə də planlaşdırılmış 2021 və 2022-ci illər üzrə büdcə, vergi və gömrük-tarif siyasətinin əsas istiqamətləri" adlı sənəddə yer alan məsələlərdən biri də budur.