Ölkədə tətbiq olunan "Regressar" layihəsi ən azı üç il xaricdə yaşayan vətəndaşları əhatə edir. Portuqaliyaya qayıtdıqları təqdirdə həmin adamlara gəlir vergisində beş il müddətinə 50 faiz endirim edilir, iş tapanlara ölkəyə yerləşmə prosesində nağd pul ödənilir. Bu tədbirin görülməsində əsas məqsəd ölkədə yerli işçi qüvvəsinin sayının azalmasının qarşısını almaqdır. İndi digər Avropa ölkələri kimi, Portuqaliyada da əhalinin yaşlanması getdikcə sürətlənir.

Dünya İqtisadi Forumunun rəsmi internet saytının (WeForum) məlumatına görə, "Regressar" layihəsi başlayandan bəri 72 fərqli ölkədən 1700 nəfər şəxs öz ölkəsində iş tapmaq üçün qeydiyyatdan keçib. Məlumatda qeyd olunub ki, Portuqaliya hazırda sərmayəçilərə və məşğulluğu təmin edən sahibkarlara ölkədə yaşamaq icazəsi, eləcə də yüksək ixtisaslı işçilərə vergi güzəşti tətbiq edir.