İspaniya hökuməti əsas ərzaq məhsullarına aid əlavə dəyər vergisi (ƏDV) güzəştini iyun ayından sonra da davam etdirəcək. İspaniya Krallığının Birinci vitse-prezidenti və iqtisadiyyat naziri Nadia Kalvino bu barədə açıqlama verib.

Nazir İspaniya Sosialist İşçi Partiyasının (PSOE) qərargahında keçirilmiş mətbuat konfransında deyib: "Mən təsdiq edə bilərəm ki, biz daha əlverişli qiymət səviyyəsinə çatana qədər əsas ərzaq məhsullarından daha az ƏDV tutulmasına davam edəcəyik". O, əlavə edib ki, əsas ərzaq məhsullarına tətbiq olunan vergi güzəşti qiymət səviyyəsi “daha münasib” olana qədər saxlanılacaq.
N.Kalvino hazırda qüvvədə olan tədbirlərdən hansının iyun ayından sonra davam etdiriləcəyinin nəzərdən keçirdiyini bildirib.

Qeyd edək ki, keçən il dekabr ayının sonunda ölkənin Baş naziri Pedro Sançes böhran dövründə vətəndaşları maddi cəhətdən qorumaq üçün 10 milyard avro həcmində yeni yardım paketinin təsdiq edildiyini açıqlamışdı. Yardım paketinin əsas aspektlərindən biri inflyasiyanın təsirlərini yumşaltmaq üçün istehlak səbətinə daxil olan bəzi məhsullara görə tutulan ƏDV-nin azaldılmasıdır. Məsələn, hökumət çörək və süd də daxil olmaqla, bütün əsas ərzaq məhsullarına tətbiq edilən 4%-lik ƏDV-ni 6 ay müddətinə ləğv etmiş, kərə yağı və makaron kimi bir sıra məhsullara tətbiq edilən ƏDV-nin dərəcəsini isə 10%-dən 5%-ə endirmişdi.