Satışa çıxarılan “Toshiba” şirkətinin iflas səbəbləri...
Yaponiyada 1875-ci ildən fəaliyyət göstərən və dünyada yüksək texnologiyanın böyük bir dövrünə damğasını vurmuş “Toshiba” şirkəti son vaxtlar bir çox problemlərlə üzləşib. Xüsusilə 2017-ci ildə ABŞ-da atom elektrik stansiyası (AES) biznesinin uğursuzluğu “Toshiba”ya böyük zərbə vurub. Üstəlik də, son vaxtlar yaşadığı mühasibat qalmaqalı ilə şirkət çıxılmaz vəziyyətə düşüb.
“CNN Türk” kanalının xəbərinə əsasən, illərdir davam edən problemləri “Toshiba”nın sonunu gətirib və şirkət “Japan Industrial Partners” (JİP) tərəfindən 15,2 milyard dollarlıq satınalma təklifini qəbul edib.
Satınalma hələ təsdiqlənməsə də, ekspertlərin açıqlamalarına görə, bu, “Toshiba”nın qeyri-müəyyənlik vəziyyətindən çıxması üçün mühüm addım olacaq.
Şirkətin süqutunun başlanğıcı 2017-ci ilə təsadüf edir. O vaxt “Toshiba” ABŞ-da AES-in tenderini udaraq işə başlamışdı. Lakin nəticə uğursuz oldu və “Toshiba” məsuliyyətə cəlb olundu. Bu uğursuzluğun gətirdiyi məsuliyyət şirkətin üzərində maliyyə yükü yaratdı və şirkəti iflasa doğru sürükləməyə başladı.
Daha sonra şirkətin ən böyük məxfi səhmdarı “Effissimo Capital Management” fondu “Toshiba”ya ciddi təzyiq göstərdi. Bu təzyiqlər və maliyyə yükləri qarşısında “Toshiba” 2022-ci ilin yazında satılmaq qərarına gəldi.
Son rüb hesabatları çox da ürəkaçan olmayan “Toshiba” yaxın günlərdə JIP qrupuna daxil olacaq. Gələcəyi ilə bağlı açıqlama verilməsə də, şirkətin texnologiya istehsalını davam etdirəcəyi təxmin olunur.
