Qardaş ölkənin Ticarət Nazirliyi rəsmi “Twitter” hesabında xaricdən göndərilən yardım materiallarının gömrük prosedurları ilə bağlı açıqlama paylaşıb. Açıqlamada bildirilir ki, Qəhrəmanmaraşda baş verən və 10 vilayətə təsir göstərən zəlzələ nəticəsində zərər görən insanlara pulsuz paylanmaq üçün xaricdən göndərilən mallar dövlət qurumlarına və müəssisələrinə, ictimai birliklərə və prezident tərəfindən vergidən azad edilən vəqflərə göndərildiyi təqdirdə onlardan gömrük vergiləri tutulmur.

Müvafiq nazirliklər tərəfindən müntəzəm koordinasiyanın təmin edilməsi üçün yardım üçün mallar aşağıda göstərilən qurum və təşkilatlardan hər hansı birinə göndərilməlidir:

- AFAD;

- Ankara Sosial Yardımlaşma və Həmrəylik Vəqfi;

- Şanlıurfa Sosial Yardımlaşma və Həmrəylik Vəqfi;

- Qəhrəmanmaraş Sosial Yardımlaşma və Həmrəylik Vəqfi;

- Adıyaman Sosial Yardımlaşma və Həmrəylik Vəqfi;

- Adana Sosial Yardımlaşma və Həmrəylik Vəqfi;

- Hatay Sosial Yardımlaşma və Həmrəylik Vəqfi;

- Diyarbakır Sosial Yardımlaşma və Həmrəylik Vəqfi.

Yardımların gömrük prosedurlarını həyata keçirmək üçün nəqliyyat sənədini və əgər varsa, malların siyahısını onların keçdiyi gömrük orqanına təqdim etmək kifayət edəcəkdir.