Keçən il Çində yeni enerji mənbələri ilə işləyən avtomobillərə vergi güzəşti təxminən ikiqat artıb
Çin Dövlət Vergi Administrasiyasının məlumatına görə, dövlətin yeni enerji mənbələri ilə işləyən nəqliyyat vasitələri (NEV) istehlakını təşviq etmək səylərinin bir hissəsi olaraq keçən il ölkədə satınalma vergisindən azad edilən məbləğ əvvəlki illə müqayisədə 92,6 faiz artıb.
2022-ci ildə ümumilikdə 87,9 milyard yuan (təxminən 13,06 milyard dollar) məbləğində vəsait istehlakçılara güzəşt edilib.
Çin NEV sektorunun inkişafını dəstəkləmək üçün 2014-cü ildən istehlak vergisindən azadetmə siyasətini həyata keçirir. Vergi güzəştli siyasətinin müddəti 2022-ci ilin sentyabrında 2023-cü ilin sonuna qədər uzadılıb.
Dövlət Vergi Administrasiyasının rəsmisi Çen Xinquo bildirib ki, vergi orqanları bu məsələdə şəffaflığı gücləndirəcək, vergitutma prosedurlarını sadələşdirəcək və nəqliyyat vasitələrinin qeydiyyatını asanlaşdıracaq.
Avtomobil İstehsalçıları Assosiasiyasının məlumatında isə bildirilib ki, Çində yeni enerji mənbələri ilə işləyən nəqliyyat vasitələrinin satışı 2022-ci ildə 93,4 faizdən çox artaraq təxminən 6,89 milyon ədəd təşkil edib.
