Dubayda spirtli içkilərin satışından tutulan 30 faizlik vergi ləğv edilib

Dubay hakimiyyəti spirtli içkilərin satışına qoyulan 30 faizlik yüksək vergini yerli biznesi və turizmi inkişaf etdirmək məqsədilə müvəqqəti olaraq ləğv etmək qərarına gəlib.

“Bloomberg” agentliyinin məlumatında bildirilir ki, Birləşmiş Ərəb Əmirlikləri (BƏƏ) ölkədə müsəlmanlara spirtli içkilərin satışını qadağan edib, ona görə də bu addımın atılması ilk növbədə Dubaya xaricdən gələn turistlərə və ölkənin on milyonluq əhalisinin 80 faizindən çoxunu təşkil edən əcnəbilərə yönəlib. Agentlik yazır ki, qiymətlərin yüksək olması bir çox sakini spirtli içkilər almaq üçün qiymətlərin xeyli aşağı olduğu qonşu əmirliklərə getməyə məcbur edirdi. Dubayda spirtli içkilərin iki distribütorundan biri – “Maritime and Mercantile International” artıq bu cür səfərlərdən imtina etməyə çağırıb. Digər distribütor – “African & Eastern” şirkəti də qiymətləri aşağı salıb.

Əvvəllər 70 dollara başa gələn alkoqol almaq üçün lisenziya üçün ödəniş də yeni qərarla ləğv edilib.

Qeyd edək ki, bu tədbir bir il müddətində eksperiment kimi tətbiq olunur, alkoqol satışına görə 5 faizlik ƏDV-nin tutulması isə davam edəcək.