ABŞ tənzimləyici orqanları kriptovalyutalarla bağlı xəbərdarlıq edib
ABŞ-nin Federal Rezervlər Sistemi, Federal Əmanətlərin Sığortalanması Agentliyi və Maliyyə Qurumları Bürosu ilk dəfə birgə bəyanat yayaraq bankları kriptovalyuta bazarlarında mövcud olan risklər barədə xəbərdar edib.
Maliyyə qurumlarına ünvanlanan müraciətdə rəqəmsal aktiv şirkətləri tərəfindən potensial fırıldaqçılıq, hüquqi qeyri-müəyyənlik və çaşdırıcı məzmunlu açıqlamalara ehtiyatla yanaşmağın zəruri olduğu bildirilib.
Banklara isə sektorda problemlərin “yayılması riskinə” qarşı ayıq-sayıq olmaları barədə xəbərdarlıq edilib.
Kriptovalyuta birjası FTX-in çökməsi nəticəsində kriptovalyuta sektorunda şok yaranandan iki ay sonra verilmiş açıqlamada bankların kriptovalyuta fəaliyyətlərinin yaxından izlənildiyi vurğulanıb: “Keçən il baş verən hadisələrdə kriptovalyuta sektorunda əhəmiyyətli dəyişkənliyin və zəifliklərin yaranmasının şahidi olduq”.
Nəzarət qurumları bankları rəqəmsal aktivlər bazarındakı problemlərin ümumilikdə maliyyə sisteminə yayılmasının qarşısını almaq üçün addımlar atmağa dəvət edib. “Kriptovalyuta sektorunda düzəldilə və ya nəzarət edilə bilməyən problemlərlə bağlı risklərin bank sisteminə köçürülməsinə yol verilməməlidir”, - açıqlamada bildirilib.
Qeyd edək ki, ABŞ-da bir neçə ay əvvəl bankların maliyyə bazarına nəzarət edən qurumlardan kriptovalyutalarla bağlı daha aydın məsləhətlər tələb etmələrinə baxmayaraq, onlar öz müraciətlərinə cavab ala bilməmişdilər.
