Türkiyədə 2023-cü il yanvarın 1-dən 2 faizlik yaşayış vergisinin tətbiqinə başlanacaq.

“Rəsmi qəzetə”də nəşr edilmiş sənəddə yerləşdirməyə görə vergini otellərin, turizm kəndlərinin, motellərin, pansionatların, qonaq evlərinin və digər yerləşdirmə obyektlərinin bilavasitə özləri tutacağı göstərilir. Səyahət agentlikləri də bu vergini öz tur paketlərnə daxil edə bilərlər.

Yataqxanalarda, pansionatlarda və düşərgələrdə yaşayan şagird və tələbələr, habelə Türkiyədə akkreditə olunmuş diplomatik nümayəndəliklərin və diplomatik statusa malik beynəlxalq təşkilatların nümayəndələri bu vergidən azaddırlar.

Türkiyədə yaşayış vergisinin tutulması ilə bağlı qərar 2019-cu ilin oktyabrında verilmişdi. İlkin olaraq bir otel otağının qiymətinin 2%-i qədər vergi tutulması barədə qərar 2020-ci il aprelin 1-dən qüvvəyə minməli idi, lakin koronavirus pandemiyası səbəbindən hökumət onun icrasını təxirə salmışdı.

Qeyd edək ki, bu il Türkiyənin turizm sənayesi üçün son dərəcə uğurlu olmuşdur. Turizm naziri Mehmet Nuri Ersoyun sözlərinə görə, ilin yekunlarına görə, ölkəyə gələn turistlərin sayı 2019-cu ilin səviyyəsinə yaxın olacaq. Həmin il Türkiyəyə 51 milyon xarici ziyarətçi gəlmişdi.