Çin ƏDV-nin qaytarılmasını sürətləndirir

Maliyyə Nazirliyi və Dövlət Vergi Administrasiyasının birgə yazılı açıqlamasına görə, Çin əlavə dəyər vergisi (ƏDV) krediti güzəştlərini daha çox sənaye sahəsinə tətbiq edəcək. Bildirilib ki, bu qərar biznesin çətinlikdən çıxmasına kömək etmək və ölkədə iqtisadiyyatı sabitləşdirmək səyləri çərçivəsində qəbul edilib. Açıqlamada, iyulun 1-dən topdan və pərakəndə satış, kənd təsərrüfatı, yaşayış və ictimai iaşə kimi sektorlarda şirkətlərin ƏDV kreditinin geri qaytarılması siyasətindən faydalanmağa başlayacağı bildirilib.

Açıqlamaya görə, yeni əlavə edilmiş ƏDV kreditləri hər ay tam geri qaytarılacaq. Çin müəssisələrə pul axınını tənzimləmək və bazar qurumlarının canlanmasını dəstəkləmək məqsədilə bu il ƏDV-nin qaytarılmasını sürətləndirib. Maliyyə Nazirliyi bu ayın əvvəlində bildirmişdi ki, Çində bu il ƏDV krediti güzəştləri məbləğinin 1,64 trilyon yuana (təxminən 246 milyard dollar) yüksələcəyi gözlənilir.