Barselona Məhkəməsi İspaniyada olduğu müddətdə əldə etdiyi gəlirləri “vergi cənnəti” ölkələrində gizlədərək vergidən yayınmaqda günahlandırılan Şakiranın etirazlarını rədd edib və onun mühakimə olunmasına qərar verib. Məhkəmə müğənninin cinayət məsuliyyətinə cəlb edilməsi üçün kifayət qədər dəlil olduğu qənaətinə gəlib.

Prokurorluq 2012-2014-cü illərdə 14,5 milyon avro məbləğində vergidən yayınma iddiası ilə Şakiraya qarşı 6 müxtəlif ittiham üzrə cərimə və həbs cəzası tələb edir.

Şakiranın işi ilə məşğul olan hüquq firması tərəfindən verilən açıqlamada isə kolumbiyalı müğənninin "haqlı olduğu üçün günahsızlığını müdafiə etməyə davam edəcəyi" bildirilib.
Hüquq firmasının açıqlamasına görə, “müdafiə tərəfinin irəli sürdüyü iddialar məhkəmə tərəfindən rədd edilməyib və proses adi qaydada davam edir”.