Avrasiya İqtisadi İttifaqına (Aİİ) üzv ölkələrdə onlayn mağazaların ikiqat vergitutmadan azad olunacağı hədd müəyyən edilə bilər. “İzvestiya” qəzetinin Rusiyanın Sənaye və Ticarət Nazirliyinə istinadən yaydığı məlumata görə, bu məsələ Qırğızıstanın paytaxtında keçirilmiş Avrasiya İqtisadi Forumunda müzakirə olunub.

İnternet Ticarət Şirkətləri Assosiasiyasının (AKIT) rəhbəri Artyom Sokolov bildirib ki, hazırda Aİİ çərçivəsində fəaliyyət göstərən onlayn pərakəndə satıcılar iki dəfə ƏDV ödəyirlər: malın yola salındığı ölkədə və təyinat ölkəsində. Bu vəziyyət Aİİ ölkələrinin milli qanunlarında 2022-ci ildə qüvvəyə minmiş bir sıra dəyişikliklərlə əlaqədar yaranıb. Ekspert qeyd edib ki, başqa ölkələrin şirkətləri məhsulları idxal edən ölkədə ƏDV ödəmirlər.

Sənaye və Ticarət Nazirliyinin mətbuat xidmətindən "İzvestiya"ya verilən məlumata görə, hazırda Aİİ üzvü olan dövlətlərin onlayn mağazalarının təyinat yerində ƏDV ödəməkdən azad ediləcəyi həddinin müəyyənləşdirilməsi müzakirə olunur. Bununla belə, dövlətlər bu həddin nə qədər olacağı ilə bağlı hələ razılığa gələ bilməyiblər.