Ermənistanın dövlət borcu son 4 ildə 37,6 faiz artıb
Ermənistanın dövlət borcu 4 il ərzində 2,58 milyard dollar artıb. Yerli mətbuatda yayılan məlumata əsasən, aprel ayında ölkənin dövlət borcunun məbləği 91,3 milyon dollar artaraq ümumilikdə 9,45 milyard dollara çatıb.
Hökumət antiböhran tədbirlərinin həyata keçirilməsi adı altında təkcə 2021-ci ildə dövlət borcunu 1,25 milyard dollar artırıb. Bu ilin ilk dörd 4 ayında isə dövlət borcu 222 milyon dollar artıb.
Bu məbləğin əhəmiyyətli hissəsi Mərkəzi Bank tərəfindən valyuta məzənnəsinin sabitləşməsi üçün istifadə edilib.
Hazırda Ermənistanda adambaşına düşən dövlət borcunun məbləği 3.200 dollara yaxındır. Bununla belə, borcun kəskin artması ümumi daxili məhsulun (ÜDM) proporsional artımına müsbət təsir göstərməyib.
Dörd il ərzində borc məbləğinin 2,45 milyard dolları xərclənsə də, nominal ÜDM artımı 1,6 milyard dollar olub. Orta yoxsulluq səviyyəsi isə gözlənilənlərin əksinə olaraq 27%-ə yüksəlib. Belə çıxır ki, borc ölkənin sosial-iqtisadi problemlərini həll etmək əvəzinə, mövcud problemləri daha da dərinləşdirib.
