BVF qlobal iqtisadiyyatın İkinci Dünya Müharibəsindən sonra ən pis vəziyyətə düşdüyünü bildirib

Beynəlxalq Valyuta Fondunun (BVF) yaydığı son hesabatda qlobal iqtisadiyyatın İkinci Dünya Müharibəsindən bəri ən pis vəziyyətə düşməsinin koronavirus pandemiyası, geosiyasi gərginlik və iqlim dəyişikliyi təhlükəsi səbəbindən baş verdiyi vurğulanıb. Nəticədə bütün dünyada inflyasiya artıb, ərzaq və enerji məhsulları bahalaşıb.

BVF ekspertlərinin fikrincə, dünya iqtisadiyyatının vəziyyətini yaxşılaşdırmaq üçün bu addımların atılması zəruridir:

• ticarət məhdudiyyətlərinin yumşaldılması;

• borcların ödənilməsi probleminin, o cümlədən ödənişlərin restrukturizasiyası yolu ilə həll edilməsi;

• transsərhəd köçürmələr sisteminin modernləşdirilməsi;

• iqlim dəyişikliyi probleminin həll edilməsi.

BVF-nin hesabatında qeyd olunub ki, böhranın nəticələri ilk növbədə ən çox borclanmış ölkələrə və şirkətlərə təsir edəcək: onlar tədarük zəncirlərini yenidən qurmalı olacaqlar. BVF-nin qənaətinə görə, mənfi nəticələr əhalinin bütün kateqoriyalarına, o cümlədən ən zənginlərə də təsir edəcək.