Tennis üzrə keçmiş dünya çempionu vergidən yayındığına görə azadlıqdan məhrum edilib
London məhkəməsi məşhur idmançı, tennis üzrə keçmiş dünya çempionu Boris Bekkeri vergi borclarını ödəməmək məqsədilə maliyyə aktivləri haqqında məlumatları gizlətdiyinə görə 2,5 il müddətinə həbs cəzasına məhkum edib.
TASS agentliyinin məlumatında qeyd edilib ki, B.Bekker 2017-ci ildə müflis elan olunmuşdu. Məhkəmənin qənaətinə görə, həmin vaxt o, 1 milyon funt sterlinq (hazırkı məzənnə ilə 1,3 milyon dollar) dəyərində daşınmaz əmlak, aldığı iri bank krediti, həmçinin əvvəllər əldə etdiyi səhm paketi barədə məlumatları səlahiyyətli orqanlardan və kreditorlardan gizlədib. Bundan əvvəl isə 2002-ci ildə o, vergidən yayındığına görə Almaniyada 2 il müddətində şərti məhkumluq cəzası almışdı.
"Siz xəbərdarlıqdan nəticə çıxartmamısınız və şərti cəza verilməklə sizə yaradılan imkandan istifadə etməmisiniz ki, bu, sizin üçün əhəmiyyətli dərəcədə ağırlaşdırıcı haldır", - məhkəməni aparan hakim xanım Debra Taylor hökmü elan edərkən B.Bekkerə deyib.
