Almaniyanın maliyyə naziri vergi yükünü 30 milyard avro həcmində azaltmaq niyyətindədir

Almaniyanın maliyyə naziri Kristian Lindner hazırkı yaşayış şərtlərini nəzərə alaraq vətəndaşların və orta biznes müəssisələrinin vergi yükünün 30 milyard avrodan artıq azaldılması ilə yanaşı, hökumətin xərclərində də qənaət edilməsini planlaşdırdığını bildirib. Bu barədə açıqlama verən maliyyə naziri qeyd edib ki, 2022-ci ilin büdcəsi əvvəlki hökumətin izlərini daşıyır, ancaq 2023-cü il üçün hazırlanan büdcəyə vergi yükünün azaldılması daxildir.

Pensiya sığortası üçün ödənilən mükafatın vergidən azad ediləcəyini, eləcə də bərpa olunan enerjinin maliyyə mənbələri üçün elektrik enerjisinin qiymətlərindəki əlavə ödəmələrin ləğv ediləcəyini bildirən maliyyə naziri deyib: “Hazırkı yaşayış şərtləri dövründə insanların və orta ölçülü biznes müəssislərinin vergi yükünü açıq şəkildə 30 milyard avrodan artıq həcmdə azaldacağıq”.

Qlobal koronavirus epidemiyasının təsirinə məruz qalan şirkətlər üçün “korona vergi qanunu” hazırlayacaqlarını bildirən maliyyə naziri vurğulayıb: “Bu çərçivədə bir silsilə yardım tədbirləri görüləcək və ya mövcud tədbirlərin əhatə dairəsi genişləndiriləcək. 2022 və ya 2023-cü illərə aid zərərlərin həcmi əvvəlki illərin mənfəətinə əsasən hesablanacaq. Heç kəs vergi borclarına görə pandemiya dövründə öz biznesini itirməməlidir.