Avstraliyanın Baş naziri Skott Morrison öz ölkəsi ilə Böyük Britaniya arasında ticarəti daha əlverişli hala gətirəcək, işçilər, gənclər, istehsalçılar və biznes qurumları üçün yeni imkanlar yaradacaq sərbəst ticarət sazişinin imzalandığını bildirib: “Bu, Yeni Zelandiya istisna olmaqla, Avstraliyanın imzaladığı ən əhatəli və iddialı sərbəst ticarət sazişidir”, - Baş nazir hökumətin rəsmi internet səhifəsindən yaydığı açıqlamada qeyd edib.

Böyük Britaniyada Avstraliya vətəndaşlarına Avropa İttifaqı vətəndaşlarına bərabər hüquqlar tanıyacaq yeni ticarət sazişinin qüvvəyə minməsi ilə Avstraliyanın Böyük Britaniyaya ixrac etdiyi malların 99 faizindən çoxuna tətbiq olunan 9,2 milyard dollar dəyərində gömrük vergisi ləğv ediləcək.

Böyük Britaniya mallarına tətbiq olunan gömrük vergilərinin ləğv edilməsi ilə Avstraliyanın işgüzar mühitinin hər il 200 milyon dollar vəsaitə qənaət edəcəyi gözlənilir.

Qeyd edək ki, Avstraliya və onun ən böyük ticarət ortağı olan Çin arasında son illərdə yaranmış diplomatik anlaşılmazlıqlar səbəbindən Çin hökuməti 2020-ci ildə Avstraliyadan idxal edilən kənd təsərrüfatı mallarına əlavə gömrük vergisi qoyub.

Çin ilə problemlərin həllini tapa bilməyən Skott Morrison hökuməti Avstraliyanın kənd təsərrüfatına yeni bazarlar tapmaq və ixracatçıların Çin bazarından asılılığını azaltmaq məqsədilə yeni yollar axtarışındadır.