2018-ci ildən qüvvədə olan “tax free” pilot layihəsi çərçivəsində xarici ölkələrin vətəndaşları Rusiyada elədikləri alış-veriş zamanı ödədikləri əlavə dəyər vergisini (ƏDV) Avrasiya İqtisadi İttifaqı ərazisini tərk edəndən sonra geri ala bilirlər. Layihə xarici ölkə vətəndaşlarına dəyəri bir gün ərzində 10 min rubldan az olmamaq şərtilə satın aldıqları texnika, ərzaq məhsulları, zərgərlik məmulatları kimi mallar üçün ödədikləri ƏDV-ni geri almaq hüququ verir.

2020-ci ilin sentyabrında Dövlət Dumasına pilot proqramın bu ilin əvvəlindən başa çatdırılması ilə bağlı qanun layihəsi təqdim olunsa da, layihəyə baxılması təxirə salınmışdı. Qanun layihəsində hazırda hökumət tərəfindən müəyyənləşdirilmiş konkret mağazalar üçün qüvvədə olan “tax free” sisteminin Rusiya Federasiyanın ərazisindəki bütün müəssisələrə tətbiqi nəzərdə tutulur. Lakin hələlik bu məsələ ilə bağlı qanunda dəyişiklik edilməyib. Baş Nazir Mixail Mişustinin əmrinə əsasən, eksperimentin müddəti 2021-ci il dekabr ayının 31-dək uzadılıb.