17 Oktyabr 2021

VERGİLƏR

SOSİAL-İQTİSADİ ONLAYN QƏZET

Rusiyada neft sektoruna tətbiq olunan bir sıra vergi güzəştləri ləğv edilib

2021-c il yanvarın 1-dən qüvvəyə minmiş qanuna əsasən neft sektorunda fəaliyyət göstərən şirkətlərin faydalı qazıntıların çıxarılması vergisi üzrə, eləcə də neft hasilatı texnologiyası ilə bağlı ixrac rüsumu üzrə subsidiyalaşdırılması dayandırılıb.
Rusiyada neft sektorunda ciddi vergi islahatlarının aparılmasına 2020-ci ilin payızında başlanmışdı. Neftin qiymətinin aşağı düşməsi və büdcə daxilolmalarının kəskin şəkildə azalması fonunda hökumət bir sıra vergi güzəştlərini ləğv etmək məcburiyyətində idi. Maliyyə Naziri Anton Siluanov neft sektorunda bəzi stimullaşdırıcı tədbirlərin səmərəsiz olduğunu bəyan etmişdi.
Bu güzəştlərin ləğvindən 2021-2023-cü illərdə dövlət büdcəsinə 308,1 milyard rubl (7 milyard manat) əlavə vəsaitin daxil olacağı gözlənilir.
Şirkətlərə güzəştlərin ləğv olunduğu yataqları əlavə gəlir vergisi rejiminə keçirməyə icazə verilir. Əlavə gəlir vergisi layihəsi neft şirkətlərini stimullaşdırmaq üçün nəzərdə tutulub. Bu dəyişiklik sayəsində dövlət büdcəsinə neftdən daxil olan vəsaitlərin üç il müddətində 200 milyard rubl (4,55 milyard manat) artacağı proqnozlaşdırılır.