Mayda istehlak qiymətləri indeksi aprel ayı ilə müqayisədə 99,5 faiz, yanvar-may aylarında əvvəlki ilin müvafiq dövrü ilə müqayisədə isə 102,9 faiz təşkil edib.

Dövlət Statistika Komitəsindən bildirilib ki, qiymətləri dövlət tərəfindən tənzimlənən məhsullar və xidmətlər, həmçinin mövsümi xarakter daşıyan kənd təsərrüfatı məhsulları nəzərə alınmadan hesablanan və bazis inflyasiyası kimi qəbul edilmiş istehlak qiymətlərinin bazis indeksi bu ilin may ayında aprel ayı ilə müqayisədə 99,9 faiz, cari ilin yanvar-may aylarında əvvəlki ilin müvafiq dövrü ilə müqayisədə isə 102,2 faiz təşkil edib.

Bu ilin mayında ərzaq məhsulları, içkilər və tütün məmulatları üzrə istehlak qiymətləri indeksi aprel ayı ilə müqayisədə 98,7 faiz, cari ilin yanvar-may aylarında əvvəlki ilin müvafiq dövrü ilə müqayisədə isə 105,5 faiz olub. Mayda qeyri-ərzaq məhsulları üzrə istehlak qiymətləri indeksi aprel ayı ilə müqayisədə 100,1 faiz, bu ilin yanvar-may aylarında əvvəlki ilin müvafiq dövrü ilə müqayisədə isə 101,2 faiz təşkil edib. May ayında əhaliyə göstərilmiş ödənişli xidmətlər üzrə istehlak qiymətləri indeksi aprel ayı ilə müqayisədə 100 faiz, cari ilin yanvar-may aylarında əvvəlki ilin müvafiq dövrü ilə müqayisədə isə 101 faiz olub.