Respublikada oktyabr ayı üzrə sutkalıq neft hasilatı 718 min barel olub. Bunun 644 min barrelini xam neft, 74 min barelini kondensat təşkil edib. Gündəlik 569 min barrel xam neft, 76 min barel kondensat, 9,5 min barel isə neft məhsulları ixrac olunub. Energetika Nazirliyindən bildirilib ki, sutkalıq neft hasilatının 776 min barel həcmində saxlanılmasına dair razılaşma çərçivəsində Azərbaycan hasilatı sutkada 20 min barel azaltmaqla bağlı götürdüyü öhdəliyi tam yerinə yetirib. Cari ilin yanvar–oktyabr aylarında orta gündəlik neft hasilatı 762 min barrel təşkil edib.

Energetika Nazirliyi oktyabr ayında gündəlik neft hasilatı ilə bağlı məlumatları OPEC-in Birgə Monitorinq Komitəsinin Müştərək Texniki Komissiyasına təqdim edib. Xatırladaq ki, ötən il dekabrın 7-də "OPEC plus" üzrə neft hasilatının gündəlik 1,2 milyon barel azaldılması ilə bağlı imzalanmış "Əməkdaşlıq Bəyannaməsi"nin müddəti bu ilin iyulun 1-dən 2020-ci ilin ilk rübünün sonunadək uzadılıb.