"Azərbaycan Sənaye Korporasiyası" ASC-nin (ASK) baş direktoru Kamran Nəbizadə bildirib ki, 2019-cu ildə 38 rayonda ümumilikdə 641 ton yaş barama istehsal edilib. Həmin məhsul "Azəripək" MMC-də qəbul olunub, baramanın ilkin emalı prosesi həyata keçirilib, qurudularaq anbarlara yığılıb.

Baş direktorun sözlərinə görə, "Azəripək" MMC bu il barama istehsalı ilə məşğul olan kümçülərin hesablarına ümumilikdə 2 milyon 500 min manatdan artıq vəsait köçürüb: "Bu ilin proqnozuna uyğun olaraq, yaş baramanın qəbulu və emalı üçün "Azərbaycan Sənaye Korporasiyası" ASC hələ keçən ilin sonlarından müvafiq infrastrukturun yaradılmasına başlayıb: mövcud baramaboğan avadanlıqları əsaslı təmir edilib, iki ədəd yeni baramaboğan avadanlığı, bir ədəd 10 tonluq buxar qazanı alınıb və müəssisədə quraşdırılaraq istifadəyə verilib".

Növbəti illərdə istehsal olunacaq yaş baramanın həcminin artırılacağını deyən K.Nəbizadə Şəkidə 1,6 hektar torpaq sahəsində yeni barama tədarükü və emalı məntəqəsinin yaradılacağını bildirib. Bu məqsədlə artıq texniki-iqtisadi əsaslandırma və layihələndirmə sənədləri hazırlanıb.