Azərbaycan Mərkəzi Bankının (AMB) operatoru olduğu Hökumət Ödəniş Portalı (HÖP) üzərindən bu ilin yanvar-sentyabr aylarında həyata keçirilən əməliyyatların həcmi 2 milyard 286 milyon manat təşkil edib. Bu da ötən ilin eyni dövrü ilə müqayisədə 36 faiz artım deməkdir. AMB-dən bildirilib ki, aparılan nağdsız əməliyyatların həcmi isə 3,4 dəfə artaraq 956 milyon manat olub. Hesabat dövründə HÖP-ün əhatə dairəsi genişləndirilib, 1.437 bələdiyyə üzrə ödənişlərin qəbul edilməsi imkanı yaradılıb. Bununla da, bələdiyyələr daxil olmaqla, əksər dövlət orqanları, kommunal xidmət müəssisələri, mobil rabitə operatorları, ali təhsil müəssisələri və sair qurumların 550-dən çox xidməti üzrə ödənişləri portalın onlayn resurslarından, bankların elektron bankçılıq xidmətlərindən istifadə etməklə nağdsız qaydada aparmaq mümkündür.