Aqrar Tədarük və Təchizat ASC-nin İdarə Heyətinin sədri Leyla Məmmədovanın rəhbərliyi altında nümayəndə heyəti Moskvada işgüzar səfərdədir. Səfərdə məqsəd sentyabrın 24-27-də Moskva Beynəlxalq Qida Sərgisində iştirak etməkdir. Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən bildiriblər ki, sərgidən əvvəl, sentyabrın 23-də Aqrar Tədarük və Təchizat ASC-nin nümayəndə heyəti Hindistan Qida istehsalçılarının ənənəvi forumuna qatılıb. Görüş çərçivəsində "Hindistan və MDB ölkələrinin 2020-ci ildə qida ticarəti münasibətlərinə ümumi baxış" mövzusunda baş tutan plenar sessiyada qurumun İdarə Heyəti sədrinin müşaviri Vüqar Namazov və ixrac şöbəsinin müdiri Bahadır Rəşidli təqdimatla çıxış edib.

Daha sonra 25-dən çox şirkət təmsilçisinin iştirak etdiyi foruma fəxri qonaq kimi qatılan ATT İdarə Heyətinin sədri Leyla Məmmədova çıxış edərək, Azərbaycanda kənd təsərrüfatının bugünkü vəziyyəti, investisiya imkanları barədə məlumat verib, tədbirdə iştirak edən şirkətlərin nümayəndələrini 2020-ci ildə Bakıda keçiriləcək "Caspian Agro" Beynəlxalq Sərgisinə dəvət edib.

Görüş barədə fikirlərini bölüşən Leyla Məmmədova davamlı olaraq müxtəlif beynəlxalq sərgilərdə iştirak etdiklərini, yerli fermer və qida istehsalçılarının sərgilərdə iştirakını dəstəklədiklərini bildirib: "Moskva Beynəlxalq Qida Sərgisi bu sahədə ən böyük sərgilərdən biridir. Davamlı olaraq bu və digər ölkələrdə keçirilən sərgilərdə ölkəmizi təmsil edirik. Azərbaycan istehsalı kənd təsərrüfatı və qida məhsullarının ixrac coğrafiyasını genişləndirmək üçün mütəmadi olaraq ikitərəfli görüşlər keçiririk. Bu dəfə Hindistan Qida istehsalçıları ilə ikitərəfli görüşümüz oldu. Bu günə qədər ixrac əməliyyatlarımızda ənənəvi ölkələrlə yanaşı, Nigeriya, BƏƏ kimi qeyri-ənənəvi ölkələr də yer alıb. İxrac hədəflərimiz böyükdür və Hindistan nümayəndə heyəti ilə görüşümüzdə də Azərbaycan kənd təsərrüfatı və ərzaq məhsullarının ixracı prioritet müzakirə mövzusu oldu".

Forumda iştirak edən şirkətlərin nümayəndələrini sabah start götürəcək Moskva Beynəlxalq Qida Sərgisində Azərbaycan stendini ziyarət etməyə dəvət edən Leyla Məmmədova, Hindistan iş adamlarının ölkəmizdə kənd təsərrüfatı sahəsinə investisiya qoymaqda maraqlı olduqlarını, bunun üçün Aqrar Tədarük və Təchizat ASC tərəfindən lazımi dəstək göstəriləcəyini bildirib.

Qeyd edək ki, Moskva Beynəlxalq Qida Sərgisi sentyabrın 27-dək davam edəcək. Aqrar Tədarük və Təchizat ASC sərgidə "Kənddən Şəhərə" adı altında qablaşdırılmış yerli istehsal kənd təsərrüfatı və ərzaq məhsullarını nümayiş etdirəcək.