Ödəniş sistemləri iştirakçıları arasında tətbiq edilən interçeyncin (xidmət haqqı tariflərinin) yuxarı hədləri təsdiqlənib. Bu barədə Mərkəzi Bankın sədri Taleh Kazımov qərar imzalayıb.

Qərarla ölkə daxilində ödəniş kartları ilə müəyyən MCC kodları (təsərrüfat subyektinin fəaliyyət sahəsinin təsnifləşdirilməsi üçün ekvayer tərəfindən təyin edilən kod) üzrə aparılan ödənişlərdə interçeyncin yuxarı hədləri müəyyən edilib.

Belə ki, aptek və ərzaq mağazaları (supermarketlər) kateqoriyalarına aid əməliyyatlar üzrə interçeyncin yuxarı həddi ödəniş məbləğinin 1,25 faizi, yanacaq (petrol) kateqoriyası üzrə 0,75 faizi, ümumi (general) kateqoriya üzrə isə 1,5 faizi səviyyəsində müəyyən olunub.

Göstərilən kateqoriyalara daxil olmayan digər MCC kodları üzrə ölkə daxilində kartla aparılan ödənişlər üçün interçeyncin yuxarı həddi müəyyən edilmir.

Yeni tariflər 2026-cı il iyunun 1-dən qüvvəyə minəcək.