“S&P” Bank Sektorunun Ölkə Risk Qiymətləndirməsi (BICRA) çərçivəsində Azərbaycanın bank sektoru üçün sahəvi risk komponenti üzrə reytinqini yaxşılaşdıraraq 8-ci səviyyədən 7-ci səviyyəyə endirib.

Azərbaycan Mərkəzi Bankının məlumatına görə, bu, ölkənin bank sektoru ilə bağlı risk səviyyəsinin azalmasının göstəricisidir. Bu dəyişiklik son üç ildə Mərkəzi Bank tərəfindən bank sektoru üzrə tənzimləmə və nəzarətin modernizasiyası təşəbbüslərindən qaynaqlanır.

İqtisadi risk komponenti üzrə gözlənti isə 8-ci pillədə saxlanılmaqla, proqnoz “stabil”dən “pozitiv”ə dəyişdirilib.

“S&P” ötən dövrdə Mərkəzi Bank tərəfindən “2024-2026-cı illərdə maliyyə sektorunun inkişaf Strategiyası” çərçivəsində korporativ idarəetmə standartlarının yeniləndiyini, likvidlik riskinin idarə edilməsi üzrə qaydaların, həmçinin bank kapital strukturunun Bazel III tələblərinə uyğunlaşdırdığını və digər tənzimləmələrin təkmilləşdirildiyini vurğulayıb.

Agentlik 2026-cı ildə bankların aktivlərinin keyfiyyəti üzrə göstəricilərin sabit qalacağını və kredit portfelinin artım tempinin 10–12 faiz intervalında olacağını proqnozlaşdırır. “S&P” kreditlərin dollarlaşma səviyyəsinə görə region ölkələri arasında ən aşağı göstəricinin Azərbaycan banklarının payına düşdüyünü vurğulayıb.