2018-ci ilin aprel ayından 2025-ci il 15 oktyabr tarixinədək Azexport.az portalı vasitəsilə elektron qaydada 763 ədəd sərbəst satış sertifikatı təqdim olunub.

İqtisadi İslahatların Təhlili və Kommunikasiya Mərkəzinin məlumatına görə, 2025-ci il ərzində 10 ədəd sertifikat verilib.

Sərbəst satış sertifikatları əsasən Yaxın Şərq və Ərəb ölkələri, Avropa, Asiya, Afrika, Amerika və Cənub-Şərqi Asiya regionlarının bir sıra ölkələrinə ixrac zamanı istifadə olunub.

Qeyd edək ki, sertifikatın dəyəri bir məhsul üzrə 20 manat təşkil edir. Eyni məhsul üzrə hər əlavə ölkə üçün təqdim edilən sertifikatlara görə 5 manat məbləğində ödəniş tutulur. Elektron müraciətlərə baxılması və sertifikatın verilməsi adətən 1–3 iş günü ərzində həyata keçirilir.

Bu elektron xidmət ixrac prosedurlarının sadələşdirilməsinə, sahibkarlar üçün inzibati yükün azaldılmasına və Azərbaycan məhsullarının beynəlxalq bazarlara çıxış imkanlarının genişləndirilməsinə xidmət edir.