Biləsuvar rayonunda “Aqrar Biznes” festivalı keçirilib. Festivalda dövlət qurumlarının nümayəndələri, Şirvan-Salyan iqtisadi rayonunu əhatə edən Biləsuvar, Hacıqabul, Neftçala, Salyan və Şirvan rayonlarının fermer və sahibkarları iştirak ediblər.

Kənd Təsərrüfatı Nazirliyinin məlumatına görə, Festivalda müxtəlif quş əti məhsulları və kənd təsərrüfatının müxtəlif sahələrinə dair məhsul və texnologiyalar sərgilənib.

Festival çərçivəsində “Quşçuluğun dayanıqlı inkişafı: yeni çağırışlar və imkanlar” mövzusunda panel müzakirəsi keçirilib. Panel müzakirəsində Heyvandarlıq və Balıqçılıq Elmi-Tədqiat İnstitutunun, Baytarlıq Elmi-Tədqiqat İnstitutunun, Aqrar Xidmətlər Agentliyinin, Azərbaycan Qida Təhlükəsizliyi Agentliyinin, Aqrar Sığorta Fondunun mütəxəssisləri spiker qismində çıxış ediblər.

Bununla yanaşı, Festival çərçivəsində regionlarda sahibkarlığın inkişafına dəstək, eləcə də fermer və rayon sakinlərinin güzəştli kreditlərlə bağlı daha da məlumatlandırılması məqsədilə Kredit Yarmarkası təşkil edilib. Yarmarkada fermerlər aqrar təyinatlı kreditlərin verilmə şərtləri, müxtəlif kredit məhsulları və fermerlərin mövcud təsərrüfatlarına və planlarına uyğun olaraq kreditlərin maksimal həcmi barədə məlumatlandırılıblar.