Azərbaycan maliyyə bazarında ilk dəfə olaraq “Açıq bankçılıq” funksionallığının tətbiqinə başlanılıb.

Azərbaycan Mərkəzi Bankının məlumatına görə, “Açıq bankçılıq” yanaşmasını tənzimləyən normativ aktlar və texniki platforma hazırlanıb. Platformaya 13 kommersiya bankı tam inteqrasiya edilib, 6 bank üzrə isə işlər yekunlaşmaq üzrədir.

Hazırda iki bank tərəfindən (“Azərbaycan Beynəlxalq Bankı” və “Turan Bank”) “Açıq bankçılıq” funksionalı mobil tətbiqlər üzərindən müştərilərə təqdim edilir. Bu mobil tətbiqlər vasitəsilə bank müştəriləri üçün onların razılığı əsasında digər banklarda olan hesabları və hesab üzrə ödəniş əməliyyatları haqqında məlumatları vahid bir tətbiq üzərindən əldə etmək imkanları yaradılıb.

Cari ilin sonunadək “Açıq bankçılıq” platformasının əhatə dairəsinin genişlənməsi və digər kommersiya bankları, ödəniş təşkilatları və elektron pul təşkilatlarının da bu platformaya qoşulacağı nəzərdə tutulur.