Bu ilin yanvar-avqust ayları ərzində ölkəyə 733 milyon ABŞ dolları dəyərində 37,2 minə yaxın hibrid avtomobil idxal olunub.

Dövlət Gömrük Komitəsinin hesabatına əsasən, bu, 2024-cü ilin eyni dövrünün göstəricilərini dəyər ifadəsində 1,9 dəfə və ya 345,1 milyon dollar, say baxımından isə 2,7 dəfə və ya 23,6 min ədəd üstələyir.

Hesabat dövründə idxal edilən hibrid avtomobillərin strukturunda HEV (Hybrid Electric Vehicle) tipli avtomobillərin payı 31 faiz, PHEV (Plug-in Hybrid Electric Vehicle) tipli avtomobillərin payı isə 69 faiz təşkil edib.

Cari ilin ilk 8 ayında ölkəyə 241,8 milyon dollar dəyərində 11,5 min ədəd HEV avtomobilləri idxal edilib ki, bu da ötən ilin eyni dövrünün göstəricisindən dəyər ifadəsində 1,7 faiz, say baxımından isə 24,5 faiz çoxdur. Bununla yanaşı 491,8 milyon dollarlıq 25,6 min ədəd Plug-in tipli hibrid elektrik avtomobilləri idxal edilib. Bu, bir il öncəki göstəriciləri müvafiq olaraq 3,3 və 6 dəfə üstələyir.

Ümumilikdə cari ilin ilk 8 ayında ölkəyə 1,38 milyard dollar (+24,3 faiz) dəyərində 74,4 mindən (+26,4 faiz) çox nəqliyyat vasitəsi idxal edilib. Hesabat dövründə avtomobil idxalının strukturunda hibrid avtomobillərin payı 49,92 faiz təşkil edib ki, bu da bir il öncəki göstəricidən 27 faiz bəndi çoxdur.