Azərbaycan və Rusiya Federasiyasının Samara vilayətinin müəssisələri arasında əməkdaşlıq haqqında razılaşmalar əldə olunub.

Samara vilayəti KİV-nin yaydığı məlumata əsasən, Bakıya təşkil olunan biznes-missiya çərçivəsində nümayəndə heyətinin üzvləri Kiçik və Orta Biznes Subyektləri və Klublarının Assosiasiyasının (KOBSKA) nümayəndələri ilə işgüzar görüşdə iştirak edib və Azərbaycanda biznesin aparılmasının xüsusiyyətləri barədə danışıblar.

“Azera Holding”lə görüşdə tərəflər Samara istehsalçılarından məhsulların tədarükü və onların Azərbaycanda istehsalının təşkili ilə bağlı ətraflı şərtləri nəzərdən keçirmək barədə razılığa gəliblər. Nümayəndə heyətinin üzvləri holdinqin şirkətlərindən biri olan “Sara Logistics” ilə əsas logistika məsələlərini müzakirə ediblər.

İşgüzar missiyanın nəticəsi olaraq bir sıra razılaşmalar əldə olunub:

- Samara şirkəti “Osnovnoy Product” MMC-nin məhsullarının Bakının pərakəndə satış şəbəkələrində yerləşdirilməsi haqqında,

- “Assosiasiya SIP” MMC ilə turizm bazalarının tikintisi layihəsi üzrə,

- “Sara” şirkəti ilə - Qarabağda tikinti layihələri üzrə,

- “Greenstream” müəssisəsi ilə ev dəstlərinin tədarükü haqqında.