Bu ilin iyun ayında Azərbaycan İpoteka və Kredit Zəmanət Fondunun vəsaitləri hesabına ölkədə fəaliyyət göstərən banklar tərəfindən 6,9 milyon manat həcmində ipoteka krediti verilib. "APA-Economics"in Azərbaycan Mərkəzi Bankına istinadən verdiyi məlumata görə, bu, may ayı ilə müqayisədə 2,9 dəfə və ya 13,3 milyon manat azdır. Cari ilin yanvar-iyun aylarında banklar tərəfindən 100,7 milyon manatlıq ipoteka krediti verilib ki, bu da ötən ilin analoji dövrü ilə müqayisədə 14,2 faiz və ya 16,7 milyon manat azdır.

İyun ayında Fond tərəfindən yenidən maliyyələşdirilmiş ipoteka kreditlərinin həcmi əvvəlki aya nisbətən 33,6 faiz və ya 7,1 milyon manat azalıb. Cari ilin yanvar-iyun ayları ərzində isə Fondun yenidən maliyyələşdirilmiş ipoteka kreditlərinin ümumi həcmi 135,6 milyon manat olub ki, bu da ötən ilin eyni dövrü ilə müqayisədə 25,2 faiz və ya 27,3 milyon manat çoxdur.