2024-cü ilin ilk yarısında qeyri neft-qaz sektorunda əlavə dəyər ötən ilin müvafiq dövrünə nəzərən real ifadədə 6,9% artıb.

“vergiler.az” xəbər verir ki, bu barədə Azərbaycan Mərkəzi Bankının “Pul siyasəti icmalı”nda bildirilib. Məlumata görə, qeyri neft-qaz sektorunda əlavə dəyər nominal olaraq 38,8 milyard manat təşkil edib. Sənayenin qeyri neft-qaz seqmentində məhsul istehsalı 7,4% artıb.

2024-cü ilin ötən dövrü ərzində kənd təsərrüfatında 0,2% artım qeydə alınıb. Heyvandarlıq məhsulları istehsalı 2,1% artıb, bitkiçilik məhsulları istehsalı isə 1,4% azalıb.

Xidmət sektorunda müşahidə edilən yüksək artım dinamikası davam edib. 2024-cü ilin yanvar-iyun aylarında nəqliyyat və anbar təsərrüfatı 15,4%, yük və sərnişin daşımaları isə müvafiq olaraq 4% və 8,2% artıb.

Dövr ərzində qeyri neft-qaz sahələri arasında ən yüksək iqtisadi artım nümayiş etdirən sahələrdən biri tikinti sektoru olub. 2024-cü ilin yanvar-iyun aylarında əvvəlki ilin müvafiq dövrünə nəzərən tikinti sektoru 18,4% artıb. Bu artımın əldə edilməsində işğaldan azad olunmuş ərazilərdə quruculuq-bərpa işləri mühüm rol oynayıb.

Dövr ərzində informasiya və rabitə sektorunda əlavə dəyər 2023-cü ilin müvafiq dövrü ilə müqayisədə 12,2%, turizm və ictimai iaşə sektorunda isə 10,3% artıb.