İyulun 8-də Azərbaycanda Amerika Ticarət Palatası ("AmCham") öz üzvləri üçün Qida Təhlükəsizliyi Agentliyinin sədri Qoşqar Təhməzlinin iştirakı ilə görüş təşkil edib. Görüşdə Q.Təhməzli qida təhlükəsizliyi sahəsində görülən işlər və qarşıya qoyulan hədəflər barədə danışıb. Bununla yanaşı, tədbirdə bir neçə üzv şirkətin fəaliyyəti və xidmətləri barədə təqdimatlar nümayiş olunub. Ölkəmizdə akkreditasiya edilmiş diplomatik korpusun nümayəndələri də daxil olmaqla, tədbirdə "AmCham"ın təxminən 100 üzvü və tərəfdaşı iştirak edib.

Qeyd edək ki, "AmCham" xarici və yerli biznesin maraqlarını dəstəkləyən və təşviq edən qeyri-kommersiya əsaslı aparıcı ticarət-sənaye assosiasiyası 1996-cı ildə yaradılıb və ölkə iqtisadiyyatının müxtəlif sektorunda fəaliyyət göstərən 280-dən çox üzv şirkəti birləşdirir. Palata ölkədə bütün xarici investisiyaların təxminən 80 faizini, eləcə də yerli investisiyaların mühüm hissəsini təmsil edir. Belə işgüzar görüşlər qurum tərəfindən hər ay təşkil olunur və bu tədbirlərdə yüksək vəzifəli hökumət rəsmiləri, beynəlxalq maliyyə qurumlarının rəsmi şəxsləri və diplomatik korpusun nümayəndələri iştirak edirlər.

Tədbirdə Qida Təhlükəsizliyi Agentliyinin sədri ölkəmizdə qida təhlükəsizliyinin təmin edilməsi ilə əlaqədar qurumun üzərinə düşən məsuliyyəti diqqətə çatdıraraq istehlakçıların təhlükəsiz və minimum keyfiyyət tələblərinə cavab verən qida məhsulları ilə təmin edilməklə onların həyat və sağlamlıqlarının, habelə maraqlarının qorunmasının sahibkarların əsas öhdəliklərindən biri olduğunu vurğulayıb. O, həmçinin, qida zəncirinin bütün mərhələlərində fəaliyyət göstərən sahibkarlıq subyektlərinin agentlik tərəfindən maarifləndirilməsi istiqamətində həyata keçirilən tədbirləri görüş iştirakçılarının diqqətinə çatdırıb. Sədr “Azərbaycan Respublikasında qida təhlükəsizliyinin təmin edilməsinə dair 2019-2025-ci illər üçün Dövlət Proqramı”nın əsas strateji hədəflərindən birinin bu sahədə dövlət-özəl sektor əməkdaşlığının inkişafı ilə bağlı olduğunu qeyd edib.