İqtisadi Zonaların İnkişafı Agentliyinin tabeliyində olan Mingəçevir Sənaye Parkının rezidenti “Mingəçevir Tekstil” MMC Türkiyə və Rusiyaya məhsul ixracının həcmini artıracaq.

Bunu “Azərbaycan iqtisadiyyatı” Teleqram kanalına MMC-nin direktoru Əli Əsədov deyib.

Onun sözlərinə görə, MMC hazırda iki müəssisəsinin - iplik istehsalı ilə məşğul olan “Ring Spining” və “OpenEnd” fabriklərinin istehsal gücünün artırılması üçün işlər görür. Bu iki fabrikin ümumi aylıq istehsal gücünün 200 ton artırılaraq mövcud 1200 tondan 1400 tona (hər fabrik üçün təxminən 700 ton) çatdırılması nəzərdə tutulur. Artıq “Ring Spining” fabrikində istehsalın genişləndirilməsi üçün xaricdən gətirilmiş yeni avadanlıqlar quraşdırılıb. “OpenEnd” fabriki üçün yeni avadanlıqlar isə apreldə gətiriləcək.

MMC istehsalı artırmaqla 8-12 yeni daimi iş yeri yaradacaq. İndiyədək istehsalın genişləndirilməsinə 7 milyon manata yaxın sərmayə qoyulub.

Ə.Əsədov əlavə edib ki, “Mingəçevir Tekstil” MMC-nin fabriklərində Almaniya, İsveçrə, Yaponiya və Türkiyə texnologiyaları əsasında istehsal edilən ipliklər Türkiyə, Rusiya və Ukraynaya ixrac edilir. MMC aylıq istehsal gücünün artırılması sayəsində istehsal ediləcək bütün məhsulları ixraca yönəldəcək.

İlhamə İSABALAYEVA