SOCAR Qarabağ və Şərqi Zəngəzur regionlarının karbon neytrallığı zonasına çevrilməsi prosesində aktiv iştirak edir.

Bu barədə “Vergi sistemi yeni inkişaf dövründə: davamlı iqtisadiyyat üçün strateji hədəflər” Forumu çərçivəsində keçirilən panel müzakirədə SOCAR-ın vitse-prezidenti Əfqan İsayev deyib.

Onun sözlərinə görə, bu layihə çərçivəsində sahələrin dekarbonizasiya layihəsi planlaşdırılır, eyni zamanda, enerji həllinin işlənilməsi, elektrik avtomobilləri üçün infrastrukturun qurulması və yaşıl yanacaq layihəsinin həyata keçirilməsi nəzərdə tutulur.

"Dekarbonizasiya fəaliyyətlərinin həyata keçirilməsi ilə SOCAR Azərbaycanın milli dayanıqlılıq hədəflərinin əsas dəstəkçisi və aparıcı qüvvəsidir. Məlum olduğu kimi, Azərbaycan istixana qazlarının baza ili 1990-ci il ilə müqayisədə 2023-ci ilədək 35 faiz, 2050-ci ilədək isə 40 faiz azaldılması barədə könüllü öhdəlik götürüb. SOCAR-ın dekarbonizasiya proqramının icrası ölkə üzrə karbon izinin azaldılmasına əhəmiyyətli dərəcədə müsbət təsir göstərəcək",- deyə Ə.İsayev qeyd edib.