Ölkənin Rəqəmsal İqtisadiyyat Strategiyası hazırlanıb. Strategiya həm dövlət, həm biznes, həm də vətəndaş cəmiyyəti daxil olmaqla 60-dan çox layihə və təşəbbüsləri əhatə edəcək.

Bu barədə Dördüncü Sənaye İnqilabının Təhlili və Koordinasiya Mərkəzinin (4SİM) 2023-cü il üzrə fəaliyyətinə dair hesabatın təqdimatında çıxış edərkən Mərkəzin icraçı direktoru Fariz Cəfərov deyib.

Onun sözlərinə görə, strategiya yeni iş yerlərinin yaradılması, infrastruktur layihələrinin həyata keçirilməsi, texnologiyalarin daha geniş tətbiq olunması və sair müxtəlif böyük layihələri əhatə edir.

"2024-cü ildə bu sənədin dövlət qurumları ilə birgə müzakirədən sonra təsdiqlənməsi və icrasına başlanması planlaşdırılır. Bu çərçivədə biz 100-dən çox dövlət və özəl təşkilatlarla görüş keçirmişik. 250-dən çox şirkətlə sorğu keçirilib və bu sorğunun nəticələrinə uyğun olaraq, sənəddə müxtəlif təşəbbüslər nəzərə alınıb. Strategiyada əsas 9 ana layihə nəzərdə tutulur",- deyə F.Cəfərov qeyd edib.