2023-cü il ərzində Azərbaycanın MDB ölkələri ilə ticarət dövriyyəsinin ümumi həcmi 6,2 faiz və ya 373 milyon ABŞ dolları artaraq 6,4 milyard dolları ötüb.

"Azərbaycan iqtisadiyyatı" Teleqram kanalının Dövlət Gömrük Komitəsinin hesabatı əsasında apardığı hesablamalara görə, ötən il Azərbaycandan MDB ölkələrinə 1,65 milyard dollar dəyərində məhsul ixrac edilib ki, bu da 2022-ci ilin göstəricisindən 1,2 faiz və ya 17,5 milyon dollar çoxdur.

MDB ölkələrindən Azərbaycana idxal edilən məhsulların dəyəri isə 8 faiz və ya 355,4 milyon dollar artaraq 4,76 milyard dolları üstələyib.

2023-cü ilin nəticələrinə görə, ölkənin ümumi ticarət dövriyyəsində MDB ölkələri ilə ticarətin payı 12,54 faiz təşkil edib ki, bu da 2022-ci ilin göstəricisindən 1,1 faiz bəndi çoxdur.