“AzerGold” QSC-nin törəmə şirkəti – “Daşkəsən Dəmir Filiz” (DDF) MMC tərəfindən ölkənin ən böyük qara metal yataqları kompleksi olan “Daşkəsən” dəmir filizi yataqları qrupunun istismarı layihəsi çərçivəsində geoloji tədqiqatlar davam etdirilir.

QSC-dən verilən məlumata görə, ötən dövr ərzində yataqlar qrupuna daxil olan “Cənub-şərq” və “Şimal-qərb” yataqlarında aparılan geoloji kəşfiyyat işlərinin nəticəsi olaraq, yerin təkində olan resurslarda 69,7 milyon ton artım əldə edilib. Bununla “Daşkəsən” dəmir filizi yataqları qrupu üzrə yerin təkində olan filiz ehtiyatlarının ümumi kütləsi 309,16 milyon tona çatdırılıb.

Növbəti mərhələdə Böyük Britaniyanın “Micon International” şirkəti tərəfindən “Cənub-şərq” və “Şimal-qərb” mədənləri üzrə açıq karxana üsulu ilə 21 illik istismar planı hazırlanıb. Geoloji tədqiqatlar çərçivəsində istismar müddətinin 25-30 ilə çatdırılması növbəti hədəf olaraq müəyyən edilib. Belə ki, “Cənub-şərq” və “Şimal-qərb” yataqlarının cinahlarında geniş geoloji kəşfiyyat işləri, “Cənub-qərb”, “Dəmirov” və “Dardərə” yataqlarında isə ilkin kəşfiyyat-tədqiqat işləri həyata keçirilir.