Əczaçılıq məhsullarının istehsalı artıb
Bu ilin yanvar-oktyabr aylarında ölkədə 17,2 milyon manat dəyərində əczaçılıq məhsulları istehsal edilib.
"Azərbaycan iqtisadiyyatı" Teleqram kanalının Dövlət Statistika Komitəsinin hesabatı əsasında apardığı hesablamalara görə, bu, bir il öncəki müvafiq göstəricini 45,8 faiz və ya 5,4 milyon manat üstələyir.
Hesabat dövründə pərakəndə ticarət şəbəkəsində əczaçılıq məhsulları və tibbi ləvazimatlara istehlakçılar tərəfindən 1 039,2 milyon manat xərclənib ki, bu fa ötən ilin müvafiq göstəricisi ilə müqayisədə 15,1 faiz və ya 136,7 milyon manat çoxdur.
Qeyd edək ki, cari ilin ilk 10 ayında istehlakçıların pərakəndə ticarət şəbəkəsində xərclədiyi vəsaitin 2,2 faizi əczaçılıq məhsullarının alınmasına sərf olunub.
Dövlət Gömrük Komitəsinin hesabatına əsasən isə cari ilin yanvar-oktyabr aylarında ölkəyə 482,25 milyon ABŞ dolları dəyərində 23,19 min tondan çox əczaçılıq məhsulları idxal edilib. Bu, 2022-ci ilin müvafiq dövrünün göstəriciləri ilə müqayisədə dəyər ifadəsində 11,2 faiz az, həcm baxımından isə 2,1 faiz çoxdur.
2023-cü ilin ilk 10 ayı ərzində əczaçılıq məhsullarının ümumi idxalda xüsusi çəkisi 3,4 faizə bərabər olub.
