Sahibkar Ayaz Ələkbərov: “Yeni emal sahələri yaratmağı düşünürük”
“Qusarda yeni meyvə emalı sahələri yaratmağı düşünürük”. Bunu “Azərbaycan iqtisadiyyatı” Teleqram kanalına 2006-cı ildən Qusarda bağçılıq fəaliyyəti ilə məşğul olan sahibkar Ayaz Ələkbərov deyib.
Onun sözlərinə görə, bağında alma, armud, nektarin, şaftalı və s. olmaqla müxtəlif növ meyvələr yetişdirir. Hazırda alma və heyva mövsümünün olduğunu xatırladan sahibkar qeyd edib ki, daxili bazarı meyvə ilə təmin etsələr də, əsasən, ixracla məşğuldurlar. Bağında yetişdirdiyi meyvələri, əsasən, Rusiyaya ixrac edirlər. İl ərzində təxminən 2000 ton məhsul ixrac edilir. Bu il isə artıq 1000 tona yaxın meyvə ixrac ediblər: “Mən bir dəfə Dubaya da məhsul ixrac etmişəm. Amma logistika, qiymət baxımından bizim üçün Rusiyaya məhsul ixrac etmək daha rahatdır. İxraca 1-ci növ məhsulları göndərirəm, amma bizim 2-ci növ məhsullarımız da olur. Fikirləşirəm ki, bu növ məhsulları emal edərək cemlər, şirələr hazırlaya bilərik. Hazırda bunu gerçəkləşdirməyə çalışıram”.
Bağçılığın inkişafı üçün dövlət qurumlarının yardım etdiyini deyən A.Ələkbərov Sahibkarlığın İnkişafı Fondu və Aqrar Kredit və İnkişaf Agentliyinin onların fəaliyyətinə mühüm dəstək verdiyini söyləyib.
A.Ələkbərov Sahibkarlığın İnkişafı Fondundan ilk dəfə 180 min manat, 2-ci dəfə 300 min manat, 3-cü dəfə isə 615 min manat kredit alıb: “Bağın salınması üçün özümün şəxsi vəsaitim olsa da, bu, kifayət deyildi. Ona görə də 3 dəfə SİF-dən kredit alaraq bağımı genişləndirmişəm. Bu kreditlər biznesimin inkişafına çox kömək edib”.
A.Ələkbərov qeyd edib ki, bağın salınması üçün lazım olan tingləri, əsasən, Türkiyə və İtaliyadan alıb gətirir: ”Azərbaycanda yeni sortlar olmadığı üçün tingləri xaricdən gətirməli oluram. Yeni sortlar daha məhsuldar, xəstəliklərə qarşı daha davamlı, daha böyük olur”.
İlhamə İSABALAYEVA
